Perpuosta pa ouniformizar l "l"/"lh" einicial

Diç Leite de Vasconcelos na páigina 35 de ls Estudos de Philologia Mirandesa: ”

a) em sendinês o l latino inicial não se palatizou como em mirandês, conservou-se intacto como em português; ex.:

mir. central e raiano : lhana

lat. Lana{

send. lana.

“

An Castelhano i an Pertués las letras “ll” i “lh” ténen la mesma eiquibaléncia de sonidos na fala. Por l Mirandés ser ua léngua falada na Pertual i por ls falantes yá staren aquestumados a essa scrita fui adoptado l “lh” pertués.

Na purmeira adenda ouptou-se por i citando-la adenda: “Aceitar que os sendineses escrevam com um simples l- as palavras que em mirandês se iniciam com lh- e em sendinês se pronunciam com l-.”

Nun cachico de la justeficaçon apersentada diç esto: “Quer dizer: ou l- se manteve desde o latim até hoje, ou evoluiu de l- para lh- e depois novamente para l-. Seja qual for a hipótese admitida, o certo é que é difícil de aceitar, numa zona em que lh e l representam fonemas diferentes, que se escreva lh quando a pronúncia é l.”

Dezido esto, agora bieno a la tona la eideia de que se debie era ouptar por screbir l “ll” castelhano i assi yá tenie sido resolbido l porblema.

Tenendo an cunta que l Mirandês nun ye Pertués, nun ye Castelhano, nun ye Latin i nun ye Lionés, nien Asturiano; nien sequiera Astur-Lionés(alguas son la raiç, outras tubírun anfluéncia); l que bos querie poner a çcutir ye ua seluçon PRÓPIA pa l Mirandés. Assi adonde atualmente hai la debison “L” ; “LH” de l “L” einicial pertués, MAS SOLO ENDE todo mundo passarie a screbir “ll”.

Assi apersento eisemplos de cumo serien grafadas alguas palabras:

• cabalho (serie grafado de l mesmo modo);
  

• lluna (serie screbido cun ll tanto ls que fálan la bariadade Central, cumo Sendinesa cumo Raiana [cun letra grande serie “Lluna” ]);
  
• llimalha (mantén-se l lh ne l meio de la palabra mas l “L” einicial quedarie “ll”).

Esta ye ela mie perpuosta cul sentido de l melhor pa l mirandés.

Cuido que ye ua seluçon sien miedo de l passado, mas cun un uolho ne l feturo i que puode cuntentar todo mundo. Ua perpuosta oubjetiba, sien debisones i arremissacos i peç-me que serie de fácele aplicaçon.

Queda a la buossa cunsidraçon.

Cristóvão Pires,

Coimbra 15-05-2009