L artigo defenido masculino an Manuol Sardina

Manuol Sardina, que bien sabemos que era nacido an Samartino, lhugar de que fui abade muitos anhos, deixou-mos alguns testos an mirandés. Puoden ber-se alguns deilhes eiqui. Mas hai outros testos del que stan einéditos, an special ua carta para José L. de Vasconcelos, que hoije publico pula 1ª beç ne l mesmo blogue. La mie eideia ye chamar la atençon pa l uso que aquel abade samartineiro faç de l artigo defenido masculino, eiqui an çcuçon, i que correspunderie als usos de la sue tierra ne l tiempo an que José L. de Vasconcelos andaba por tierras de Miranda.

La cunclusion que saco i que todo mundo puode cumprobar, yá que nun atualizo la scrita, ye que el usa las seguintes formas daquel artigo defenido:
- êl / el: cuido que estas formas correspunderan al «l» de la Cumbençon 2009, ou será que correspónden a «al»?; registro, cumo nota antressante, que nunca usa estas formas ne l plural.
Eisemplos: El lhúito i êl dolor que me quedou; êl dialecto mirandés yê ua lhéngua cumo que de contrabando;
- 'l', 'l: parece ser la forma lo, mas an que la bogal ye eilidida porque la palabra a seguir ampeça por bogal.
Eisemplo: assinalei 'l'adverbio fatalmente para que véiades...; notai tamien que nun ten 'l adjetivo gentil.
- los: son las formas mais ousadas; fago notar que la forma lo de l singular nunca aparece, mas esso puode ser por acaso, puis aparece cumo pornome [desprezio a los que lo sabem cumo you].
Eisemplos: los anfelizes mirandeses; los gobernos paternales de l rei nuosso sinhor; los sábios nun paternales de las nuossas academias; cumo de los mius uolhos te lhevou

Muita beç usa las dues formas ua a seguir a la outra, na mesma frase.
Eisemplos: Êl mirandés, amigo, ten los adverbios tanto, quanto y tam...; vós, êl melhor amigo de los mirandeses...;