Ousserbar ye perturbar

I sei bien lo que digo, ousserbar ye perturbar. Quando un quier ber un fenomeno fizico qualquiera i que pra tal s'usa un apareilho de mediçon, l'apareilho anserido ne l sistema ven lhougo a modeficar lo que se passa.

Quando un ousserba las pessonas a falar mirandés, la mesma cousa acuntece. I'l melhor que tenemos pra fazer, crendo un studar la nuossa lhiengua, inda ye falar culos que coincemos mas. Porquei ? Porque nesse caso fazemos parte de l sistema i dessa maneira nun modeficamos nadica ne l pursseço de cumenicaçon.

Eimaginai ua casa'l pobo, todos falando mirandés, qu'acuntece quando un stranho entra ? Nun pursseço mas ou menos lento cunforme las pessonas bai-se trocando al codiyo lhienguistico anté atengir al codiyo lhienguistico de la passona stranha se tal for possible. De tal maneira que nunca ides a poder arrapanhar dalgo antersante.

I mesmo tenendo l mesmo codiyo acuntece que la ou las pessonas falan outro codiyo, nun sendo l sperado. Acuntece-me qu'an Cicuiro pessonas ponen-se a falar comigo an Purtués, you falando an Mirandés ! Anque essas pessonas falan perfeitamiente Mirandés !

L purblema ye que nun hai hoije an die maneira de saber quien fala ou no Mirandés. Supongo que dantes yera mas facél eidantificar se la pessona falaba ou no.

Falando, acuntece tamien que la pessona diga la palabra curreta an Mirandés i que lhougo açpuis currige pra la palabra Purtuésa ou nua palabra que l pareça Purtuésa ! (i.e : Ya hai ciguonhas ende ? Si, ya fazierun l nial ne l campanairo... campanario...).

Ne l que me parece ser l melhor deixo eiqui dalguas reglas pra anterferir al menos possible nun sistema cumenicatibo, querendo-l ambestigar :

1- Usar un grabador sien dezir a la/las pessonas que son grabadas.

2- Falar de maneira natural de cousas i d'outras sien fazer la coinecida question : Mas i bos cume dezies ? ou Mas i dantes cume se dezie ? Que la respuosta muita beç ye de tipo zantersada : Ho ! Mas isso éran los bielhos que dezien !

3- Eibitar la lhibreta pra notar las cousas, ya'l grabador sta ende pr'isso !

4- Saber ourientar la cumbersa pra los assuntos an relaçon cun las palabras que un quier saber, respeitando l punto 2.

5- Gardar las questiones suobre palabreiro pra las pessonas coincidas qu'ende nun hai purblemas.

6- Ser paciente.

7- Nun fuorçar las pessonas.

Assi sendo, buonas ambestigaçones !