You, eiqui atrasado, ne l Curso de Mirandés de l SAL, fiç-le ua pregunta a porsor Amadeu, que fui respundida i bien respundida. Assi i todo, inda me gustaba tornar al assunto para ber l que dízen ls de las outras tierras, que daqueilha beç se calhórun. Copio de l SAL por bias de poupar algun trabalho.
Dixe you:
Inda por bias de trocas de “E” por “A”, tamien dízen na Cumbençon: “A letra e, seguida na mesma sílaba de n ou m, representa, em posição tónica, uma vogal nasal aberta (benga). Em posição pretónica, representa uma vogal nasal muito fechada (bendima).”
Antes, na páigina 13, son apersentados ls sonidos de l ABC Mirandés i esta bogal nasal mi cerrada ye repersentada por un “i” cun un tracico al meio i un til (you nun ancontro ls símbolos fonéticos ne l cumputador, tengo que me splicar assi). L mesmo símbolo, sin til – nó nasal -, ye apersentado para repersentar l sonido de l E an “bEstido, bErgonha, cEbada, cerrado i dEzir. You sou meio xordo i nun se me puode botar muita fé, mas a mi peç-me que, an San Pedro, l sonido de l E an bEndima i an cEnteno nun será l mesmo sonido que se oube an cEbada i an cErrado i que stará más cerca de l sonido que se oube an mAndil ou an Antes, que son outros eisemplos dados an la página 13, para oucurréncias de scrita de l A. Mesmo quando ye la reduçon de l ditongo ”ie” l sonido que se oube ye A – Tiempo > tAmporada.
Dixo porsor Amadeu:
L que diç la Cumbençon ye berdade [“A letra e, seguida na mesma sílaba de n ou m, (...) Em posição pretónica, representa uma vogal nasal muito fechada (bendima).” ] an relaçon a bárias tierras de Miranda, de l mirandés central, nun sei se l mais deilhas. Puodo dezir que bal, siempre, para la fala de Sendin.
Mas cuncordo cun Alfredo [el nun ye tan duro de oubido cumo diç] que na fala de bárias tierras la letra «e» seguida de n ou m se «buolbe» an/am [cumo an mandil], mesmo nesse casos cumo tamporada. Esso bal para San Pedro, mas tamien para Zenízio [bei-se an muitos de ls testos que scríben] i para Malhadas [bei-se nas recuolhas de Duarte Martins]. Haberá mais tierras: Moisés Pires apersenta alguns eisemplos [mas nó ua tendéncia giral]: banceilho, bancelheira [, talbeç arrecolhidos an Infainç], banção [que refire a San Martino]; Manuel Preto [Bersos Mirandeses] usa amantában [an beç de amentában] i pandon [an beç de pendon].
You acrecento:
Ye bien cierto que nun sei cumo ye ne ls outros pobos (bien beio que ls de Zenízio úsan muita beç AN/AM i inda Cristóvão un die destes dezie “cun que cada pessona se eidANtefique cul mirandês”). An San Pedro tengo andado algo atento i peç-me que puodo dezir que la tendéncia/tandéncia giral (para dezir l menos) ye mesmo para nun haber – nunca - EN an posiçon pretónica. Isto, claro, sien rigor científico/ciantífico niun, solo a oubir i a procurar cumo ye que se diç.
