Muitas de las palabras terminadas an pertués an ‘’-ario’’ an Zenízio siempre las oubi cul sonido ‘’-airo’’. Assi, quando nacie un garoto tardiego lhougo ls bielhos dezien, este yá nun se lhibra dun ambentairo de menores; la burra stá prenhada de l cuntrairo, assi se dezie quando la burra staba cubierta de l cabalho; aqueilhes fúrun boluntairos pa la marina, assi se dezie de ls moços que íban pa la marina antes de tirar las suortes i de Zenízio fúrun muitos boluntairos pa la marina.
Hai outras palabras que siempre las oubi cul sonido de -airo, eisemplos: almairo, cunfessonairo, campanairo, secundairo, rosairo i outras haberá.
Francisco Domingues
