L artigo defenido masculino an Manuel Preto

Cun ajudas de l cumputador fiç bárias pesquisas na obra de Manuel Preto, Bersos Mirandeses (1993). Cumo ye sabido, este poeta mirandés naciu an Samartino i era falante de mirandés a la moda dessa tierra. L lhibro fui screbido muito antes de la Cumbençon Outográfica, cumo se bei pula era, mas nun sei se la scrita corresponde al que Manuel Preto quijo ou se alguien la demudou.

Eiqui bos deixo las cunclusiones que saquei quanto al artigo defenido masculino na obra desse poeta samartineiro, an que mantengo la scrita tal cumo l lhibro fui publicado. Dou solo alguns eisemplos pus bi que se repetien siempre na mesma al lhargo de l lhibro:

p. 13
- sêmpre há sido zquecida de todos l's govêrnos;
- l' mirandés andubo trinta centos d'anhos cu'la lhengua de fôra;
- L'mirandés há sido sêmpre um porfeito burro de carga de l's mandones;
- pinta l'demonho;
- iê a ti que iou tengo l'oubrigacióm i l'gusto d'ofrecer este lhibro;
- a ti que lhebeste l's dançadores, cu'las castanhôlas, l's palotes e la gaita:
- a vasculhar an todos l's almairos onde te cheirava;
- assi cumo l'saiote deve ser tenido cumo la marca de toda la mirandesa;

p. 15:
- Puníran-me um nome, mas som todos l's nomes
- De l's homes e de las mulhêres .
- De la squina de l'Nordeste.

p. 49
- L'squeletro medonho

p. 50
- cu'l'cuco na barriga

p. 116
- nêm por mêdo de l'einfierno nêm de l'antêrro sêm cura

p. 129
- e de l'outro quedou l mar

p. 131
- i l'sol metiu-se no mar

p. 133
- quando l'friu más apertava


Saco las seguintes cunclusiones:
- Manuel Preto usa siempre las formas l', l's: nun me parece que essas formas se puodan ler al i als;
- nien ua sola beç aparécen las formas lo / los;
- al / als solo aparece cumo contraçon de perposiçon a + artigo.

Amadeu Ferreira